Zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi, ka pritur në takim emisarin special të BE-së, Miroslav Lajçak.

Bislimi, ka thënë se në takimin që ka pasur të premten me emisarin special të BE-së për dialogun Kosovë – Serbi, diskutimet janë përqendruar në tri tema.

Sipas njoftimit të qeverisë, në takimin në mes të Bislimit dhe Lajçakut, temat kryesore ishin dakordimi dhe përgatitjet për takimin e radhës në nivel të kryenegociatorëve, zhvillimet rreth hapjes së urës mbi lumin Ibër dhe rruga përpara në planin e sekuencimit të zbatimit të marrëveshjes së Brukselit dhe aneksit të Ohrit.

“Zëvendëskryeministri Bislimi theksoi se hapja e urës kryesore të Mitrovicës mbi Ibër është çështje e trajtuar dhe dakorduar në Bruksel, në kuadër të procesit të dialogut të ndërmjetësuar nga Bashkimi Evropian dhe se ajo duhet të hapet sipas marrëveshjes ekzistuese dhe konkluzioneve të vet raportit të Komisionit Evropian të vitit 2020, që vlerëson se punimet në urë kanë përfunduar dhe ajo duhet të hapet pa vonesa dhe pa pengesa të mëtejme”.

“Ai nënvizoi se Qeveria së Republikës së Kosovës në vazhdimësi është angazhuar si palë konstruktive në dialog. Si e tillë ajo mbetet e përkushtuar për zbatim të plotë e të pakushtëzuar të marrëveshjes bazike dhe aneksit dhe e bindur që nënshkrimi i saj është garanca e duhur dhe nevojshme për zbatimin e plotë nga Serbia dhe llogaridhënien për shkeljet e vazhdueshme prej saj”, ka njoftuar qeveria.

Ndërsa, Lajçaku, pas takimit që kishte me Bislimin, ka thënë se ura e Ibrit duhet të hapet, por në koordinim me aleatët e Kosovës.