![](https://www.epokaere.com/wp-content/uploads/2024/01/Haradinaj-5.jpg)
Haradinaj ‘godet’ Osmanin: Në çdo ndyrësirë të Kurtit, ti je në mes të saj
Lideri i Aleancës për Ardhmërinë e Kosovës (AAK), Ramush Haradinaj, ka akuzuar kryeministrin Albin Kurti për largimin e Kosovës nga aleatët ndërkombëtarë, teksa ka kritikuar edhe presidenten Vjosa Osmani, e cila sipas tij është bashkëfajtore me Kurtin.
Madje, Haradinaj ka thënë se Kosova ka një presidente koti.
“Kosova ka një presidente koti që pas katër vitesh qeverisje merr guximin të dalë në televizion dhe për 40 minuta të flasë sa e rëndësishme është ShBA-ja për Kosovën, sikur gjatë këtyre katër viteve ajo të kishte qenë në hënë. Një përpjekje e mjerë për ta hequr përgjegjësinë nga vetja dhe për ta ngarkuar vetëm Kurtin. Gabim, zonja presidente. Në çdo ndyrësirë të Kurtit, ti je në mes të saj”, ka shkruar Haradinaj në “Facebook”.
Postimi i plotë i Haradinajt:
As armët e blera kineze, as armët e blera ruse, as lufta e madhe hibride serbo-ruse në Kosovë, as strukturat kriminale serbe në territorin e Kosovës nuk e kanë ndihmuar agjendën serbe në Kosovë aq sa e ka ndihmuar Albin Kurti me politikën e tij anti-amerikane dhe kundër aleatëve.
Serbia do të jepte miliarda vetëm që ta largonte Kosovën nga mbrojtja amerikane dhe vendet e tjera aleate. Albini e largoi Kosovën pa pagesë fare.
Politika e Kurtit sot në Uashington çdo ditë e më shumë konsiderohet si politikë gati armiqësore, kurse Evropa e udhëhequr nga Gjermania, me atë që tha Sarrazin, po e përjashton Kosovën nga Procesi i Berlinit dhe nga çdo nismë rajonale. Evropa po instalon politikë 6 minus 1 në Ballkanin Perëndimor.
Ky minus është Kosova: e përjashtuar nga çdo proces integrues, e sanksionuar dhe me pritje të fuqizimit të sanksioneve dhe masave të tjera izoluese.
Kosova ka një presidente koti që pas katër vitesh qeverisje merr guximin të dalë në televizion dhe për 40 minuta të flasë sa e rëndësishme është ShBA-ja për Kosovën, sikur gjatë këtyre katër viteve ajo të kishte qenë në hënë.
Një përpjekje e mjerë për ta hequr përgjegjësinë nga vetja dhe për ta ngarkuar vetëm Kurtin. Gabim, zonja presidente. Në çdo ndyrësirë të Kurtit, ti je në mes të saj.