![](https://www.epokaere.com/wp-content/uploads/2024/09/Diellza.jpg)
Kukaj akuzon Ministrinë e Punëve të Jashtme akuzohet për shpërdorim të 350 mijë eurove
Diellza Kukaj, kryetare e Aleancës së Gruas së Kosovës, ka ngritur shqetësime serioze lidhur me shpenzimin e mbi 350 mijë eurove nga Ministria e Punëve të Jashtme dhe Diasporës (MPJD). Sipas saj, këto fonde janë përdorur për të kontraktuar dy kompani që kanë kryer të njëjtën punë, duke e cilësuar këtë si një shembull flagrant të keqpërdorimit të parasë publike.
“Kontraktimi i dy kompanive për të kontaktuar të njëjtët politikanë amerikanë në të njëjtat data tregon jo vetëm mungesë profesionalizmi, por edhe papërgjegjësi të thellë nga ana e ministrisë,” tha Kukaj në një postim në Facebook. Ajo theksoi se kjo qasje është tërësisht e papranueshme, veçanërisht në një kohë kur qytetarët e Kosovës përballen me sfida ekonomike dhe financiare.
Anëtarja e Kryesisë së Aleancës për Ardhmërinë e Kosovës (AAK) kërkoi rritjen e transparencës dhe llogaridhënies institucionale. “Nuk mund të tolerohet që fondet publike të përdoren për qëllime lobimi pa rezultate fare, pa një analizë të qartë për efektivitetin dhe nevojën reale të këtyre shpenzimeve,” shtoi ajo. Kukaj bëri thirrje që ministria të japë përgjegjësi për këtë keqmenaxhim, duke nënvizuar nevojën për një qeverisje më të përgjegjshme dhe transparente në përdorimin e fondeve publike.