![](https://www.epokaere.com/wp-content/uploads/2024/01/abdixhiku-2.jpg)
Abdixhiku përkujton sulmet e 11 shtatorit: Kosova do të mbetet gjithmonë në krah të ShBA-së
Kryetari i Lidhjes Demokratike të Kosovës (LDK), Lumir Abdixhiku, ka përkujtuar 23-vjetorin e sulmeve të 11 shtatorit në Shtetet e Bashkuara të Amerikës (ShBA).
Sipas njoftimit që ka publikuar LDK-ja, Abdixhiku ka thënë se sulmi i 11 shtatorit ishte sulm mbi vlerat demokratike perëndimore.
“Sulmi mbi Kullat Binjake në Nju-Jork, në mëngjesin e 11 shtatorit të vitit 2001 i cili mori jetën e rreth 3000 njerëzve të pafajshëm, tmerroi botën. Kjo tragjedi, nuk ishte thjesht një akt dhune, por një sulm mbi vlerat e lirisë, demokracisë dhe bashkëjetesës që ndajnë vendet demokratike anembanë botës. Ky akt terrorist dhe barbar ishte sulm direkt jo vetëm për ShBA-të, por edhe gjithë botën perëndimore; ishte sulm mbi vlerat demokratike perëndimore. Sot, kur kanë kaluar mbi dy dekada nga momenti i ndodhjes së këtij akti të shëmtuar, kujtojmë dhe solidarizohemi me familjarët e viktimave të 11 shtatorit, të cilët humbën jetën pafajësish nga mania radikale e një sulmi terrorist. Kosova do të mbetet gjithmonë krah për krah me Shtetet e Bashkuara të Amerikës, duke mbrojtur lirinë, paqen dhe demokracinë si vlera të përbashkëta të dy popujve tanë!”, citohet të këtë thënë Abdixhiku.