Dita e fundit e tetorit shënon përmbylljen e fushatës kundër kancerit të gjirit, një përpjekje e rëndësishme për vetëdijësimin mbi këtë sëmundje, raporton GazetaBlic.

Kryeministri Kurti njoftoi se ndërtesa e Qeverisë do të ndriçohet në ngjyrën rozë, simbol i këtij angazhimi.

Kurti theksoi se angazhimi i Qeverisë do të vazhdojë edhe pas këtij muaji. Duke filluar nga sot, mamografia dhe rikonstruktimi i gjirit do të ofrohen falas në institucionet publike. Ai njoftoi gjithashtu se furnizimi me barna në Klinikën e Onkologjisë ka arritur mbi 90%.

Gjatë kësaj fushate, janë kryer 1500 mamografi në të gjithë Kosovën, me shërbimin e Mamografisë Mobile që ka vizituar shumë komuna. Kryeministri përmendi se fushatat e tilla janë të rëndësishme për diagnostikim dhe trajtim dhe se Qeveria do të investojë më shumë për të siguruar shërbime shëndetësore cilësore çdo ditë të vitit.

E plotë:

Dita e fundit e tetorit shënon përmbylljen e fushatës kundër kancerit të gjirit. 31 ditë por jo vetëm kaq. Kanceri i gjirit është një sëmundje ku vetëdijësimi për të ndihmon shumë. Sonte edhe ndërtesa e Qeverisë do të jetë e ndriçuar në rozë me ngjyrat simbolike kundër kancerit të gjirit.

Por angazhimi i Qeverisë sonë vazhdon aktivisht edhe pas kësaj fushate, edhe pas tetorit edhe çdo ditë tjetër.

Prej sot, mamografia dhe rikonstruktimi i gjirit do të jenë falas në institucionet publike.

Furnizimi me barna në Klinikën e Onkologjisë është mbi 90%.

Gjatë kësaj fushate 1500 mamografi janë kryer në mbarë Kosovën, vetëm në nivelin tretësor shëndetësor.

Kurse Mamografi Mobil ishte gjithandej vendit nga Prishtina në Leposaviq, në Zveçan, Junik, Viti, Gjakovë etj.

Ne do të bëjmë edhe fushatë edhe investime për diagnostikim e trajtim. Fushatat janë treguar të suksesshme dhe na kanë ndihmuar edhe ne si Qeveri të veprojmë më shpejt e të investojmë ku duhet. Secilin tetor e secilën ditë të vitit me përkushtim.