Kryeministri serb Millosh Vuçeviq iu drejtua publikut nga Novi Sadi lidhur me incidentin që goditi atë qytet.

“Kjo është një tragjedi për Novi Sadin dhe gjithë Serbinë. Shpreh ngushëllimet e mia për familjet e viktimave. Kjo është e premtja e zezë për të gjithë Serbinë”, tha Vuçeviq, transmeton Ballkani.info/

Të pranishmëve iu drejtua edhe ministri i Punëve të Brendshme, Ivica Daçiq.

“Menjëherë pas raportimit, ekipet e shpëtimit kanë mbërritur në vendin e aksidentit për pak minuta. Është duke u zhvilluar një operacion shpëtimi në të cilin po marrin pjesë 80 shpëtimtarë nga disa qytete, me përdorimin e makinerive speciale”, tha Daçiq, duke shtuar se operacioni do të zgjasë edhe disa orë të tjera.

Daçiq konfirmoi se deri më tani janë nxjerrë tetë trupat e viktimave. Dy persona mbijetuan dhe ndodhen në spital, njëri prej të cilëve është në gjendje të rëndë pasi i është prerë këmba.

Ministri theksoi se janë në kontakt me dy persona që janë ende nën rrënoja.

“Ajo që po dëgjoni tani janë tingujt e operacioneve të shpëtimit. Katër persona kanë mbijetuar deri më tani. Ne po monitorojmë situatën dhe do të informojmë publikun,” shtoi ai.

Daçiq falënderoi të gjitha shërbimet e urgjencës në Novi Sad dhe theksoi se operacioni ishte jashtëzakonisht kompleks.

“Kam ardhur një orë ose dy më parë dhe ende nuk kemi bërë shumë përparim në shpëtim. Një grua është gjallë, si dhe një vajzë rreth 14 vjeç me të cilën jemi në kontakt,” tha ministri.

Në fund ai ka theksuar se si do të përcaktohen të gjitha faktet dhe shkaqet e kësaj tragjedie dhe më pas ka shkuar për të vizituar të lënduarit në spital.