Komisioni Qendror i Zgjedhjeve (KQZ) ka caktuar tri afate për aplikimin për akreditimin e vëzhguesve të zgjedhjeve të 9 shkurtit të vitit të ardhshëm.
Afati për certifikim fillon më 22 dhjetor, ndërsa përfundon më 15 janar të vitit të ardhshëm. Kështu ka bërë me dije për Ekonomia Online, zëdhënësi i KQZ-së, Valmir Elezi.

Ai ka thënë se për zgjedhjet e fundit parlamentare të 14 shkurtit 2021 ishin akredituar rreth 30 mijë vëzhgues, pjesa më e madhe e të cilëve përfaqësonin subjektet politike pjesëmarrëse në procesin zgjedhor.

“Më 22 dhjetor 2024 do të fillojë afati për aplikim për akreditimin e vëzhguesve të subjekteve politike të cilat do të certifikohen nga KQZ për pjesëmarrje në zgjedhje. Ky afat do të përfundojë më 15 janar 2025. Më 11 janar 2025 do të fillojë afati për aplikim për akreditimin e vëzhguesve të organizatave jo-qeveritare, qeveritare, ndërqeveritare, organizatave ndërkombëtare dhe përfaqësuesve të vendeve të huaja. Ky afat do të përfundojë më 25 janar 2025. Dhe, më 21 janar 2025 do të fillojë afati për aplikim për akreditimin e mediave vendore dhe ndërkombëtare. Ky afat do të përfundojë më 4 shkurt 2025”, ka thënë Elezi.

Elezi njoftoi se KQZ-ja do të përgatisë një program të vëzhgimit të zgjedhjeve për vëzhguesit ndërkombëtar, të cilëve do t’i prezantohet sistemi zgjedhor në Republikën e Kosovës.

“KQZ është anëtar me të drejta të plota i Asociacionit të Zyrtarëve Zgjedhorë Botërorë (A-ËEB) si dhe ka marrëdhënie jashtëzakonisht të mira me shumë institucione të shteteve të ndryshme që merren me organizimin e zgjedhjeve. Aktualisht jemi në fazën e planifikimeve dhe natyrisht se do t’i ftojmë që të vizitojnë Republikën e Kosovës dhe të njihen nga afër me sistemin tonë zgjedhor. Për vëzhguesit ndërkombëtar, do të përgatisim një program njoftues me veçoritë e procesit zgjedhor në vendin tonë”, ka thënë Elezi.

Më tej, Elezi ka deklaruar se për KQZ-në, vëzhgimi i zgjedhjeve është i rëndësisë së veçantë, pasi përmes tij vëzhguesit ndihmojnë në rritjen e besueshmërisë në procesin zgjedhor dhe të evidentojnë shkeljet e mundshme.