“Në mbledhjen e radhës së Asamblesë Komunale në Gjakovë, si pjesë e rendit të ditës, nga kryetari i Komunës së Gjakovës, Ardian Gjini, është sjell pika për shfuqizimin e vendimit për interesin e veçantë për objektin e mbrojtur të trashëgimisë kulturore, kulla e Sulejman Vokshit”, është thënë në njoftimin për media të Alternativës në Gjakovë, parti kjo e cila drejtohet nga Mimoza Kusari-Lila.

Sipas Alternativës, asambleja e kaluar me kërkesën e ish-kryetares Kusari-Lila, kishte marrë vendim që ky objekt të jetë i interesit të veçantë, në mënyrë që të kompensohen banorët e kësaj kulle dhe objekti si pjesë e trashëgimisë kulturore të ketë trajtimin dhe mbrojtjen institucionale të Komunës së Gjakovës që të parandalohet shitja e paralajmëruar nga banorët e saj.

“Me këtë rast gjatë mandatit të qeverisjes Kusari Lila, ishin përfunduar edhe procedurat e shpronësimit si dhe ishte ndarë buxheti për kompensimin e banorëve në bazë të vlerësimit nga Ministria e Financave dhe Këshilli për Mbrojtjen e Trashëgimisë Kulturore. Që nga ditët e para të qeverisjes, kryetari aktual i Gjakovës, Ardian Gjini, kishte në shënjestër këtë objekt, duke dezinformuar dhe kontestuar buxhetin që e kishte trashëguar për shpronësimin e Kullës”, është thënë në njoftimin për media.

Alternativa në Gjakovë i ka bërë thirrje Këshillit për Mbrojtjen e Trashëgimisë Kulturore që ta parandalojë sa më parë veprimet e kryetarit Gjini, duke ia shpjeguar atij rëndësinë historike dhe kulturore që paraqet kjo kullë për trashëgimin.