Emiratet e Bashkuara Arabe kanë rezervën e shtatë më të madhe të gazit natyror në botë.

Kancelari gjerman, Olaf Scholz dëshiron të rrisë bashkëpunimin me Emiratet e Bashkuara Arabe në sektorin e energjisë, pasi deklaroi se “një seri e tërë projektesh me naftë dhe gaz natyror të lëngshëm (LNG) tashmë janë në linjë me shtetin e Gjirit”.

Gjatë një vizite në Abu Dabi, Scholz theksoi rëndësinë e mbështetjes në sa më shumë ofrues të jetë e mundur për furnizimin me energji, transmeton dpa, përcjell Albinfo.ch.

”Varësia nga një furnizues i vetëm me siguri nuk do të ndodhë më”, theksoi ai.

Para pushtimit rus të Ukrainës, Gjermania blinte 55% të gazit të saj nga Moska.

Megjithatë, që nga fillimi i luftës, qeveria gjermane ka kërkuar burime të reja furnizimi.

Ndërkohë, dërgesat nga Rusia kanë pushuar kryesisht.

Gjatë vizitës së Scholz, vendet pritet të nënshkruajnë një kontratë për dërgesat e LNG-së.