Behxhet Sh.  SHALA-BAJGORA

50 për qind me 50 për qind: Pas zgjedhjeve të fundit kemi një situatë ku votat shqiptare thuaja janë 50 për qind me 50 për qind. LV-ja ka 48 deputetë kurse PDK-ja, LDK-ja dhe AAK-Nisma i kanë 52 deputetë që nënkupton se asnjëri komunitet politik nuk e formon qeverinë pa pakicat që i kanë të garantuar 20 deputetë. LV-ja është sjell me opozitën shqiptare me shpërfillje aq të paskrupullt që mund të cilësohet edhe si sadizëm. Pas zgjedhjeve Albin Kurti e quajti opozitën, bashkë me familjarë, hajvanat që është fyerje e rëndë. Reagimi i opozitës ishte i qullët, anemik, në shpërputhje të madhe me fyerjet që iu bënë. Albin Kurthi ishte i dekurajuar me rezultatin prandaj doli nga kuadrati i një sjelljeje normale dhe të përgjegjshme. Për sjellje përbashkuese as që bëhej fjalë. Boritë e luftës kundër opozitës, LV-ja i kishte aktive gjatë tërë mandatit duke i shndërruar në vuvuzela shurdhuese para, gjatë dhe pas përfundimit të zgjedhjeve. Pozita deklaroi publikisht se nuk do të bëjë koalicion me hajvanët opozitarë kurse opozita ravijëzoi vija të kuqe ndaj LV-së. Po të kishte gatishmëri opozita të bashkohet në një qeverisje të pakushtëzuar, Albin Baba Kurthi dhe LV-ja 100 për qind do të mbetej në opozitë. Realisht, PDK-ja dhe AAK-ja ishin deklaruar për një qeveri të opozitës ku PDK-ja do ta kishte KM, kurse LDK-ja as gjatë fushatës, as gjatë votimit e as pas certifikimit të rezultateve nuk ishte deklaruar se e duan një qeveri të opozitës. Kjo është e vërteta, ma dëshmoni të kundërtën! LDK-ja e kërkonte postin e KM pa treguar se me cilin koalicion do të bashkohej. Ndonëse verbalisht të gjitha partitë opozitare e kishin si emërues të përbashkët kundërshtimin ndaj Kurthit, nuk pranuan të bëhen bashkë për materializimin e këtij kundërshtimi duke i lënë hapësirë Kurthit dhe pakicave ta bëjnë qeverinë. LV-ja i ka 48 deputetë, 20 deputetë të pakicave joserbe dhe serbe i bënë 68 deputetë mjaftueshëm edhe për një mandat 4-vjeçar. Realisht, me këtë qeveri të pakicave Albin Kurth Baba nuk mund ta bëjë asnjë punë të hajrit për Kosovën por mund të bëjë shumë punë të mira dhe të ndyra për Serbinë. Opozita, po ta kishte përnjëmend nuk do të priste se a do e bëjë Kurthi qeverinë a jo që pas kësaj të nisin bisedimet për një koalicion të mundshëm.

Si të dilet nga pozicioni pat: Po përmenden zgjedhjet e jashtëzakonshme si një shteg dalje. Sipas meje është fort e papërgjegjshme dhe e pamoralshme nga të gjithë akterët nëse e kanë një skenarë të tillë në projektet e tyre politike. Do të ishte keqpërdorim i buxhetit të Kosovës sepse pa asnjë nevojë do të bëheshin rrush dhe kumbulla dhjetëra milionë euro për zgjedhje, fushatë sikur që do të mbesim mbrapa shumë proceseve për një rezultat që nuk do të dallonte shumë nga statusquo aktuale. Nuk ia vlen të mendohet për këtë pa – mundësi. Çka duhet atëherë të bëhet? Pasi Kosovën e presin procese të rënda ku nuk do të festohet fitorja por do të menaxhohet dëmi dhe dhimbja, do të ishte i nevojshëm një koalicion ku do të përfshiheshin të gjitha partitë politike shqiptare sikur edhe ato të pakicave që do të pranonin të bëhen pjesë konstruktive e këtij procesi. Ne mund dhe duhet të deklarohemi për kërkesa maksimale mirëpo ndërkombëtarët, evropianë dhe amerikanë që i kemi pranuar si ndërmjetësues haptazi na thonë se duhet të marrim vendime të vështira dhe të dhimbshme. Jemi vonuar shumë dhe çdo ofertë e radhës do të jetë më e keqe sikur që hapësira për refuzim do të pamundësohet. Jemi të izoluar dhe nën sanksione, jemi në pozitën kur vetëm kërkojmë thuaja lëmoshë nga ata që po thonë se duhet të marrim vendime të rënda dhe të dhimbshme. Ka të marrë në qeveri që thonë se nuk duhet ta pranojmë asnjë kushtëzim, me bythë në karriget që ia përshtatin përmasave anatomike. Mendoj se duhet një konsensus kombëtar dhe politik deri të kalohen këto procese e pastaj të mbahen zgjedhjet. Për situatën e sotme të gjithë kanë përgjegjësi kush më shumë e kush më pak, pozitë dhe opozitë. Demahmetizimi folklorik i politikës i mbetjeve patriotike sikur edhe hejsllovenizimi i këshilltarëve kryesorë të Kurthit nuk janë oferta apo rrugë që na nxjerrin nga rruga njëkahore drejt theqafjes që na kanë futë sovranistët e shpifur. Për këtë jemi ku jemi dhe nuk dihet ku do të përfundojmë. Çdo zgjidhje që e përjashton apo pamundëson konsensusin kombëtar dhe politik i jep fund projektit të Kosovës si shtet i pavarur dhe sovran. Do të shndërrohemi në tokë të askujt dhe në plaçkë të çdokujt! Përgjegjësinë kryesore për ndërtimin dhe jetësimin e këtij konsensusi e ka Albin Kurti, si fitues i zgjedhjeve dhe kryetar i partisë më të madhe në Kosovë.

Si po vepron Kurti: Po e bënë të kundërtën e asaj që duhet dhe e ka detyrim njerëzor, kombëtar, politik, moral dhe kushtetues. Në vend se që ftesat e para për konsultim për formim të qeverisë t’ua dërgojë PDK-së, LDK-së dhe AAK-Nisma e pastaj partive të pakicave, e bëri të kundërtën duke bërë takime me përfaqësues të pakicave që mund ta shpëtojnë me formimin e qeverisë por jo në zgjidhjen e problemeve përcaktuese për Kosovën dhe qytetarët e saj. Kjo mundësi është në dorën e Kurtit e jo të opozitës.  Opozita duhet të heqë vijat e kuqe dhe të vetofrohet, pa asnjë kushtëzim për tejkalimin e situatës. Formula e ndarjes së pushtetit deri të përfundoi procesi i bisedimeve me Serbinë e që do ta kishte formën përfundimtare dhe të pakthyeshme si dy shtete të pavarura do të ishte: LV-ja do të udhëhiqte me qeverinë dhe do ta kishte postin e KM kurse PDK-ja, LDK-ja dhe AAK-Nisma do të merreshin vesh për udhëheqjen e Kuvendit të Kosovës sikur edhe për postin e presidentit. Jam i sigurt se Kurti nuk e pranon këtë propozim.

Po çfarë atëherë mendon të bëjë zotëri Kurthi: Plani i Albin Kurthit është ta bëjë qeverinë e pakicës  duke menduar se do t’i fitojë në mënyrë absolute zgjedhjet lokale në tetor të këtij viti. Qeveria e formuar nga ai do të përdorej apo më mirë të them keqpërdorej për të fituar zgjedhjet lokale. Deri pas përfundimit të zgjedhjeve lokale nuk do ta dërgonte draftstatutin e Zajebnicës në Gjykatën Kushtetuese kurse pas zgjedhjeve do të fillojë të zbatojë të gjitha detyrimet që i ka marrë ndaj bashkësisë ndërkombëtare. Me këtë do ta fitojë 100 për qind përkrahjen e bashkësisë ndërkombëtare e cila pastaj tërë presionin do ta bëjë te opozita që të përkrahë vendimet e Kurthit. Pas kësaj vjen radha e zgjedhjes së presidentit / presidentes. Albin Baba Kurthi do ta gjejë një kandidat që i përshtatet dhe i ndihmon, si bashkëkryerës për kapjen dhe kontrollin e të gjitha institucioneve si AKI, FSK, Gjykata Kushtetuese, KPK dhe KGJK dhe institucioneve tjera ku përgjegjësia ndahet 50 për qind me 50 për qind midis KM dhe Presidentit / presidentes. Kurti synon të kapë pushtetin dhe institucionet cep më cep, krejt dhe drejt.  Nuk synon të qeverisë por të sundojë. Në vend të demokracisë parlamentare do të ofrojë autokraci personale. Sistemin shumëpartiak do ta ketë dekor të demokracisë duke e zbatuar sistemin njëpartiak si fytyrë reale të tiranisë. Natyrisht, nëse e durojnë apo e durojmë. Jam i sigurt se as nuk do ta durojnë e as nuk  do ta durojmë. Sërish vjen marsi,  sërish……

Qofsha i gabuar unë, Baba Vang (a)jeli dhe Kosova të ecën në rrugë të mbarë dhe të drejtë, krejtësisht njëkahore ….drejt bashkimit me Shqipërinë.