Presidenti i vendit, Hashim Thaçi, mbrëmë pas mbledhjes së Këshillit të Sigurisë Kombëtare ka njoftuar se në mënyrë që të mos eskalohet situata dhe të ndodhë tejkalimi i gjendjes së krijuar pas shfaqjes së pandemisë Covid 19, do t’i propozojë Kuvendit të Kosovës dekretin për shpallen e gjendjes së jashtëzakonshme në Kosovë.

“Tani ballafaqohemi me një të keqe që mund ta kalojmë vetëm bashkërisht. Jemi nën rrethana të papërjetuara më parë”, tha ai në konferencën për media dhe bëri thirrje që të mos krijohet panik.

“Pa dashur që të nxis panik, po thërras për vigjilencë dhe që ta ndihmojmë dhe ruajmë njëri-tjetrin. Do të ishte papërgjegjësi e madhe injorimi dhe mosmarrja e të gjitha masave që kemi si shtet dhe shoqëri”, shtoi presidenti.

Por zv/kryeministri Haki Abazi, në një paraqitje që pati nga qeveria, tha se qeveria është kundër propozimit të presidentit për shpalljen e gjendjes së jashtëzakonshme.

Mbetet të shihet nëse deputetët do të votojnë sot për dekretin e Thaçit për shpallje të gjendjes së jashtëzakonshme apo jo.