Banorët e huaj, të cilët kanë vështirësi, a mund të arrijnë të njëjtën ndihmë financiare nga shteti si zviceranët dhe në çfarë rrethanash?

Shumë varet nga statusi juaj në vend. Nëse keni leje qëndrimi, keni punuar në Zvicër dhe keni kontribuar në skemën e sigurimeve shoqërore, atëherë mund të merrni ndihmë financiare, në formë subvencioni, nga autoritetet lokale.

Kështu funksionon

Për shembull, nëse primet e detyrueshme të sigurimit shëndetësor tejkalojnë 8 për qind të të ardhurave të familjes, atëherë ju keni të drejtë ta merrni këtë ndihmë.

Megjithatë, kantoni juaj i banimit do të shikojë jo vetëm të ardhurat tuaja, por edhe çdo pasuri tjetër financiare që keni.

Pra, nëse të ardhurat tuaja janë të ulëta, por keni shumë para në bankë në formën e kursimeve ose investimeve të tjera, nuk do të kualifikoheni.

Në përgjithësi, çdo banor me të ardhura të ulëta ose që ka një numër të madh fëmijësh – pavarësisht nga kombësia – mund të kualifikohet për prime të subvencionuara, megjithëse kriteret, si dhe shumat, ndryshojnë nga një kanton në tjetrin.

Po banesa?

Personat me të ardhura të ulëta (përsëri, pavarësisht nga kombësia) kanë të drejtë të subvencionohen qiratë e tyre, në rrethana të caktuara — kushtet si dhe pragu i të ardhurave përcaktohen nga autoritetet kantonale.

Në përgjithësi, për të kërkuar këtë ndihmë, duhet të provoni se jetoni në banesat më të lira në dispozicion në zonën tuaj. (Eshtë e panevojshme të thuhet, nëse banoni në një apartament luksoz, nuk mund të kërkoni subvencion për qiranë.)

Nëse nuk e përmbushni këtë kusht të veçantë, do t’ju thuhet të zhvendoseni në strehime më të lira përpara se të kërkoni ndonjë përfitim.

Përjashtimet nga ky rregull përfshijnë situata të tilla si një numër i madh i fëmijëve të mitur që jetojnë në familje, të cilat mund ta bëjnë zhvendosjen – domethënë gjetjen e një apartamenti të madh me një çmim më të lirë – joreale.

Shuma e uljes së qirasë do të përcaktohet nga autoritetet.

A ka ndonjë ndihmë tjetër në dispozicion?

Nëse nuk mund të përballoni asgjë në Zvicër, e cila, padyshim, është një situatë ekstreme dhe e rrallë për këdo që punon me kohë të plotë dhe tashmë merr sigurim shëndetësor ose subvencione për strehim (ose të dyja), atëherë e vetmja mundësi tjetër është të aplikoni për ndihmë sociale.
Megjithatë, kjo duhet të jetë zgjidhja e fundit absolute nëse dëshironi të qëndroni në Zvicër dhe përfundimisht të aplikoni për natyralizim, apo edhe të rinovoni lejen tuaj të punës.
Kjo për shkak se të qenit në asistencë publike është arsye për refuzimin e shtetësisë – përveç nëse të gjitha paratë janë kthyer plotësisht përpara aplikimit tuaj.

Po aftësitë e kufizuara?

Kjo bie nën skemën e përgjithshme të sigurimeve shoqërore, kështu që nëse jeni duke punuar në Zvicër, atëherë keni të drejtë t’i merrni këto përfitime.

Përjashtimi i vetëm mund të jenë njerëzit jashtë BE-së / EFTA – përveç nëse vendi juaj i origjinës ka lidhur një marrëveshje të sigurimeve shoqërore me Zvicrën.

Nëse kualifikoheni për paaftësi (dhe të dhënat mjekësore e konfirmojnë këtë), ju mund të aplikoni për këto përfitime në zyrën e sigurimeve shoqërore të kantonit tuaj.

Ka disa gjëra të tjera që duhet të keni parasysh gjithashtu:

Jo të gjithë të huajt që kanë leje qëndrimi mund të aplikojnë për ndihmë financiare.

Nëse keni ardhur në Zvicër me një leje të përkohshme (L ose B), atëherë nuk keni akses në asnjë përfitim.

Dhe nëse e keni ‘blerë’ rezidencën tuaj në Zvicër, nuk mund t’i drejtoheni as ndonjë ndihme publike.

Kushti i qëndrimit tuaj në Zvicër është që të jeni mjaftueshëm të vetë-mjaftueshëm për të jetuar këtu pa pasur nevojë të punoni apo të përdorni përfitime sociale./Albinfo.ch