AAK-ja, LDK-së: Nuk bëjmë asnjë kompromis për postin e presidentit
Partia e Ramush Haradinajt ka përsëritur edhe një herë se nuk negocion me LDK-në pos nëse ky subjekt pajtohet me AAK-në për presidentin. Në Aleancën për Ardhmërinë e Kosovës vlerësojnë se posti i presidentit të vendit i takon kryetarit të saj, Ramush Haradinaj.
Nënkryetari i AAK-së, Xhafer Gashi, thotë se edhe në bazë të posteve kryesore që ka LDK-ja, presidenti i takon AAK-së.
Gashi i cili udhëheq komunën e Obiliqit thotë se Haradinaj është kandidat i denjë për këtë post. “Zgjedhja e presidentit mendoj se i takon Aleancës duke e llogaritur në formulat të cilat janë në bashkëqeverisje, tani për tani e ka edhe kryeministrin dhe kryeparlamnetarin. Pastaj kandidati i cili pretendohet të jetë president është Ramush Haradainaj dhe unë konsideroj se është një kandidat i denjë”, shprehet ai për EO.
Gashi ka thënë se AAK-ja nuk do të bëjë kompromise sa i përket postit të presidentit, pasi vlerësojnë se kandidatura e Haradinaj është e arsyeshme. “Unë mendoj se në politikë ka kompromise, por mendoj se kërkesa e Aleancës në këtë rast është e arsyeshme që Haradinaj të jetë president”, thotë ai. Ndërsa sa i përket koalicionit qeverisës, ai thekson se po shkon mirë.“Unë mendoj se atyre po u shkon mirë dhe funksionimi i tyre do të jetë afatgjatë dhe tash presim se si do të zhvillohet në të ardhmen”, tha ai.