Zëvendëskryeministri Haki Abazi ka thënë se Lidhja Demokratike e Kosovës ka filluar fushatë kundër Qeverisë Kurti në pajtim të plotë me Partinë Demokratike të Kosovës.

Sipas tij, LDK dhe posaçërisht lidershipi i saj duhet ta dijë që ky është shansi për të mos bërë gabimin që bëri duke e zgjedhur Hashim Thaçin president.

“Me qëllimin e Thaçit e PDK që të ndajë Kosovën për të shpëtuar lëkurën e vetë, kurrë nuk do të pajtohej Rugova ashtu siç nuk u pajtua kurrë. Me qëllimin e Thaçit për t’a copëtuar Kosovën dhe planin e tij nuk janë pajtuar asnjë nga miqtë që kanë dhe janë duke e ndihmuar Kosovën edhe në këto momente”.

“LDK dhe posaçërisht lidershipi i saj duhet ta dijë që ky është shansi për të mos bërë gabimin që bëri duke e zgjedhur Thaçin president. Unë kam besuar shumë që ky ka qenë qëllimi i LDK kur kam qenë zëri që kam kërkuar koalicionin LVV-LDK me ngulm. Vërtet nuk e kam hall kur fyejnë e kërcënojnë njerëzit e afërt të Thaçit, e di se janë në hall. Pse LDK me instruksione t’u bashkohet zërave të PDK nuk e kuptoj. Shteti dhe qytetarët kanë dy rreziqe sot, njërën nga ndarja e vendit dhe tjetrën nga COVID-19. As e para e as e dyta nuk luftohen duke përkrahur qëllimkëqijtë dhe ata që e kanë sjellë vendin në këtë situatë”.

“Jemi kundër ndarjes së vendit dhe jemi kundër gjendjes së jashtëzakonshme që të përdoret për të bërë ndarjen e vendit. Dëgjojeni zërin e qytetarëve. Me 1989 e humbëm autonominë duke thënë nuk humbasim asgjë, me gjendjen e jashtëzakonshme dhe planin e Thaçit do humbasim territor dhe funksionimin e shtetit tonë”.

“Me vjen keq por dikush që është mashtruar në disa herë në nënshkrimin e asociacionit të komunave, demarkacionin me Malin e Zi, zgjedhjen e Thaçit President dhe që tani kur është e qartë se çfarë është motivi i tij me shpalljen e gjendjes së jashtëzakonshme, nëse nuk ndihmon dot, së paku nuk do të duhej të dalë në anën e atij dhe atyre që kanë tradhtuar interesin e vendit shumë herë”.