Presidenti i Malit të Zi, Jakov Milatoviç, e ka kundërshtuar vendimin e kryeministrit me mandat teknik Dritan Abazoviç, që edhe ai të marrë pjesë në Asamblenë e Përgjithshme të Kombeve të Bashkuara që do të mbahet këtë muaj.

Milatoviç, i cili do të jetë pjesëmarrës, ka shkruar në rrjetin social X, se vendimi i Abazoviç-it për t’u paraqitur me një delegacion të posaçëm në New York, “sjellë konfuzion në seriozitetin e përfaqësimit diplomatik” të Malit të Zi.

Milatoviç, si dhe Abazoviç, do të marrin pjesë në Asamblenë e Përgjithshme të Kombeve të Bashkuara, në New York, nga 18 deri më 26 shtator.

Për këtë çështje, institucionet malazeze kanë pasur një rregull të pashkruar; praktikohej sistemi i rrotacionit.

Në seancë, merrte pjesë një vit presidenti, ndërsa vitin tjetër kryeministri.

Këtë traditë duket se do ta prishë Abazoviç.

Ai e kishte përfaqësuar, dhe ishte udhëheqës i delegacionit të Malit të Zi në Asamblenë e Përgjithshme të OKB-së vitin e kaluar.

Kjo “përplasje” në mes të Abazoviç-it dhe Milatoviç-it vjen në një kohë kur në Mal të Zi po zhvillohen negociatat për formimin e qeverisë së re, pas zgjedhjeve të 11 qershorit.

Milojko Spajiç, lideri i Lëvizjes Evropa Tani, si fitues i zgjedhjeve parlamentare, është emëruar nga presidenti Milatoviç më 10 gusht, mandatar për ta formuar qeverinë e 44-të malazeze.

Ai, sipas ligjit, ka 90 ditë afat për ta krijuar qeverinë.

Mirëpo, Milatoviç, i cili është edhe nënkryetar i Lëvizjes Evropa Tani, nuk është pajtuar me mënyrën se si kryetari Spajiç i ka zhvilluar negociatat.

Ai, ndryshe nga Spajiç, beson se koalicioni “Për ardhmërinë e Malit të Zi” – të njohur për orientimin e tyre pro-ruso-serb – duhet që të jenë pjesë e qeverisë.

Nga ana tjetër, Milojko Spajiç, ka përjashtuar çfarëdo mundësie për të marrë në koalicionin qeverisës Partinë Demokratike të Socialistëve, dhe Lëvizjen Qytetare Ura – që udhëhiqet nga kryeministri në detyrë i Malit të Zi, Dritan Abazoviç.

Së fundmi është bërë me dije se edhe ish-Fronti Demokratik nuk do të jetë pjesë e ekzekutivit të Spajiç-it.