![](https://www.epokaere.com/wp-content/uploads/2024/09/abdixhiku.jpg)
Abdixhiku në Istog: LDK-ja është gati, e organizuar dhe reformuar
Kryetari i Lidhjes Demokratike të Kosovës, Lumir Abdixhiku, ka qëndruar sot në Istog, bashkë me të gjithë kryetarët e degëve të LDK-së në Kosovë, në punëtorinë dyditore si përgatitje e plotë për zgjedhjet e 9 shkurtit.
Ai ka bërë me dije se përgjatë këtyre dy ditëve, do t’i shtrojnë të gjitha çështjet organizative të Lidhjes Demokratike, nga caktimi i shtabeve elektorale, tek përcaktimi i vëzhguesve, komisionerëve e orarit të takimeve që nga tash e deri në fushatë.
“Lidhja po vjen e organizuar, e reformuar, e unifikuar dhe e gatshme për betejën përpara. Ky nivel i organizimit, 5 muaj më herët, tregon jo vetëm për vitalitetin tonë organizativ, jo vetëm për unitetin tonë partiak, por dhe për seriozitetin e paraprirjes për garën e ardhshme elektorale. Pas hartimit të programit politik nga nëntori i vitit të shkuar, organizimi ynë struktural bëhet ngjarja më e rëndësishme partiake. I tillë siç ka nisur, ai do të përcillet në nivel nacional tek 887 nëndegët tona në Kosovë e në Mërgatë nga tani deri në fushatë”, ka thënë ai.
Abdixhiku ka theksuar se Lidhja Demokratike është gati.
“Me strukturën tonë, njerëzit tanë, idetë e idealet tona të djathta, programin tonë politik ‘Rruga e Re’, përpjekja për një Kosovë siç e kemi ëndërruar gjithëherë gjen alternativën e domosdoshme – dhe të vetme! Prandaj, le ta bëjmë rrugën bashkë!”, ka pohuar Abdixhiku.