Ministri i Infrastrukturës, Arban Abrashi dhe kryetari i Komunës së Lipjanit, Imri Ahmeti, kanë inspektuar punimet që janë duke u bërë në ish-udhëkryqin e Janjevës, konkretisht në rrugën nacionale Prishtinë-Ferizaj.

Me këtë rast, Abrashi ka bërë me dije se ky projekt do të përfundon së shpejti.

Abrashi ka thënë se edhe pse ky projekt ishte bërë që moti, tani është në fazën e përfundimit. Në këtë kontekst, Abrashi ka theksuar se rrethrrotullimi pritet të përfundojë pas dy javësh.

“Sot pak a shumë janë fillimi i përfundimeve të punimeve në një udhëkryq shumë të rëndësishëm jo vetëm për Lipjanin dhe rrugën nacionale, por për tërë Kosovën. Fatkeqësisht ky udhëkryq ka qenë një pikë e zezë në të gjitha raportet, qoftë ministrisë tonë, qoftë policisë, një udhëkryq që ka marrë shumë jetë njerëzish për shkak të mungesës së kushteve dhe pas një projekti që është stërzgjatë fatkeqësisht, sot po fillon të merr formën përfundimtare, ndërtimi i rrethit i cili ka me lehtësuar qarkullimin e automjeteve në këtë rrugë nacionale dhe gjithsesi edhe me Lipjanin. Prandaj sot po shohim shtresat fillestare dhe pas dy jave vendoset edhe shtresa e fundit dhe sinjalizimi në mënyrë që ky udhëkryq dhe ky rreth-rrotullim të merr formën përfundimtare që ndihmon edhe lehtësimin e trafikut dhe parandalon aksidentet e tmerrshme që kanë ndodhë në këtë pikë”, ka thënë Abrashi, raporton “Ksp”.

Ndërsa kryetari i Komunës së Lipjanit, Imri Ahmeti, ka thënë se ky projekt është një ndër më të mirëpriturit nga banorët e Lipjanit.

“Është një ndër pikat më të rrezikshme në nivel vendi ky udhëkryq, ka marrë shumë jeta njerëzish. Është një ndër projektet më të mirëpritura nga banorët e Lipjanit sepse e mundëson një frekuentim më të lirë, qarkullim me të sigurt të automjeteve që frekuentojnë këtë pjesë të rajonit të Lipjanit”, është shprehur Ahmeti.

Ky projekt ka kushtuar rreth 400 mijë euro.