Zvicra vazhdon të marrë lojtarë shqiptarë në përfaqësuesen e saj, ndërsa i radhës do të jetë Kemal Ademi. Pavarësisht punës së madhe që ka bërë Shqipëria për të marrë këtë sulmues në Kombëtare, nuk është arritur që të përsëritet rasti i Florian Kamberit.

Kjo pasi Ademi është i vendosur që të mbrojë ngjyrat e Zvicrës dhe këtu nuk ka asnjë dyshim të vetëm. Helvetët janë duke vuajtur për një sulmues në formë dhe për këtë arsye hapësira do të jetë e garantuar. Por që Ademi të luajë për këtë përfaqësuese, duhej një konfirmim nga ana e Gjermanisë dhe Kosovës që kanë lidhje me këtë futbollist, që nuk ka luajtur kurrë për ta.

Sigurisht që përgjigja e Gjermanisë me dërgimin e dokumentave konfirmuese të kërkuara ka qenë e menjëhershme, pasi nuk ka asnjë pretendim të vetëm te ky sulmues.

Por Kosova e ka vonuar dhe i shton vuajtjen Zvicrës në mbylljen e procedurave, gjithsesi bëhet fjalë vetëm për një shtyrje të kohës, pasi Ademi do të luajë për këtë përfaqësuese.