Presidenti i FFK-së, Agim Ademi, ka theksuar të hënën se Liga e Parë ka rol të rëndësishëm në strukturën dhe zhvillimin e futbollit në vend.

Ai këtë deklaratë e ka dhënë gjatë takimit me përfaqësuesit e klubeve të Ligës së Parë, të cilat po kryejnë fazën përgatitore në bregdetin shqiptar, në Durrës.

Presidenti Ademi shprehu mbështetjen e plotë të FFK-së ndaj klubeve të Ligës së Parë.

Presidenti Ademi ka vazhduar kështu serinë e takimeve me klubet e futbollit në vend në prag të stinorit pranveror, duke filluar me klubet e Superligës që ndodhen në Antalya dhe tani edhe me klubet e Ligës së Parë.

Në këtë takim, presidenti Ademi ka bashkëbiseduar me përfaqësuesit e klubeve FC Liria, FC Vushtrria, FC Prishtina e Re, FC Rilindja, FC Dinamo dhe FC Trepça’89.

Gjatë diskutimeve, kreu i FFK-së ka theksuar rëndësinë që ka Liga e Parë për FFK-në, pasi ajo është liga më masovike në futbollin kosovar.

Ai gjithashtu ka inkurajuar bashkëpunimin e ngushtë midis FFK-së dhe klubeve, duke theksuar se përmes bashkëpunimit të fortë, futbolli në Kosovë mund të avancojë dhe të arrijë standarde të larta.

Vizitat e presidentit Ademi tek klubet të cilat janë duke u përgatitur për stinorin pranveror dëshmojnë përkushtimin e FFK-së ndaj të gjitha niveleve të futbollit.