Ish-kryetari i Komunës së Mitrovicës, Agim Bahtiri, ka reaguar për grevën e mësimdhënësve.

Ai përmes një postimi në llogarinë e vet në “Facebook”, ka shkruar se grevat në shoqërinë tonë kanë shije të hidhur.

“Shteti jonë ende nuk ka arritur të konsolidohet mjaftueshëm që t’jap meritat e duhura mësimdhënësve tanë”, ka shkruar Bahtiri.

Ai ka theksuar se mësimdhënësit meritojnë shumë por ka bërë apel që edhe kësaj radhe mësimi të fillojë dhe nxënësit të kthehen në bankat shkollore.

“Apeloj që palët të bisedojnë dhe të gjejnë një zgjedhje nga situata e krijuar. Shpresojmë që kjo qeveri do të arrijë të kthej dinjitetin e nëpërkëmbur të shërbyesve civil”, ka shkruar Bahtiri.