Me një minutë heshtje ka filluar ligjërata për ish kongresmenin amerikan të ndjerin, Tom Lantos, në shkollën “Hivzi Sylejmani” në Fushë Kosovë, të organizuar nga shoqata “Miqtë e Amerikës”, njofton Klan Kosova.

Arsyeja e kësaj ligjerate është për nder të ditëlindjes se Lantosit, për arsye që edhe të rinjtë të mësojnë për figurat e rëndësishme që ishin ndër të parat që ngriten çështjen e Pavarësisë së Kosovës.

Agim Rexhepi, kryetari i shoqatës tha se gjatë historisë kemi pasur pak miq, mirëpo të dëshmuar janë miqtë amerikan dhe SHBA-ja, në kohën kur ish-Jugosllavia ishte shumë e fuqishme e me miqtë e saj.

Lantos së bashku me DioGuardin e të tjerë filluan që në dhomën e përfaqësuesve të ngrisin çështjen e vrasjeve që ndodhnin në Kosovë, por edhe nevojën e pashmangshme për Pavarësi.