Agjërimi për 14 orë mund të na bëjë më pak të uritur, më energjikë dhe më të lumtur, sipas një studimi të ri nga studiuesit në King’s College në Londër.

Rezultatet e hulumtimit tregojnë se kufizimi i konsumit të ushqimit në vetëm 10 orë, për shembull midis orës 9 të mëngjesit dhe 19:00, ka një efekt pozitiv në humor, energji dhe urinë.

Studiuesit përdorën të dhëna nga vullnetarët që regjistruan gjendjen e tyre shëndetësore duke përdorur aplikacionin “ZOE”. Morën pjesë më shumë se 37,000 njerëz që hëngrën normalisht për një javë, ndërsa për dy javët e ardhshme u kërkua të hanin vetëm gjatë 10 orëve të zgjedhura të ditës.

Analiza zbuloi se ata që agjëronin për 14 orë në ditë kishin më shumë energji, ishin në humor më të mirë dhe ishin më pak të uritur.

“Ky është studimi më i madh i kryer jashtë një mjedisi rreptësisht të kontrolluar për të treguar se agjërimi me ndërprerje mund të përmirësojë shëndetin. Është emocionuese të zbulosh se nuk duhet të jemi shumë kufizues për të parë rezultate pozitive. “Një kornizë kohore 10-orëshe e të ngrënit është e tolerueshme për shumicën e njerëzve,” thotë Dr Sarah Berry.

Një përmbledhje e studimit u prezantua në Konferencën Evropiane të të ushqyerit në Beograd. Adhuruesit e agjërimit me ndërprerje zakonisht zgjedhin modelin 16:8, ku agjëroni për 16 orë, ndërsa për 8 orë mund të hani dhe pini çfarë të doni.