Asociacioni i Gazetarëve të Kosovës (AGK) ka bërë me dije se nesër (e mërkurë) do të fillojë me shpërndarjen e materialeve mbrojtëse për gazetarët, kameramanët dhe fotoreporterët.

Në donacionin e mundësuar nga Fondacioni i Kosovës për Shoqëri të Hapur (KFOS), bëjnë pjesë 313 maska respirator “FFP2”, 313 pako dorëza “latex” dhe 313 dezinfektues 500 ml. Vlera e një pako për person është 17.50 euro.

“AGK-ja ka kërkuar nga redaksitë që t’i dërgojnë vetëm emrat e gazetarëve, kameramanëve dhe fotoreporterëve të terrenit, të cilët janë më të rrezikuarit nga atakimi me virusin Covid-19. Përkundër kërkesës me emrat për kolegët tanë që janë pothuajse në vijë të parë të frontit me këtë pandemi, në adresë të AGK kemi pranuar mes tjerëve edhe emra të teknikëve, moderatorëve, redaktorëve e madje edhe emra të menaxherëve të medieve”.

“Në pamundësi që t’i ndihmojmë të gjithë punonjësit medial dhe me qëllim që asnjë kolegë i yni që punon në terren të mos mbetet i pa pajisur me materiale mbrojtëse, stafi i AGK-së po punojnë në mënyrë vullnetare, që procedura e shpërndarjes të zgjas më shumë, me qëllim të vetëm, që mjetet mbrojtëse t’u shpërndahen kolegëve tanë që punojnë në terren, e të cilët janë në rrezik të drejtpërdrejtë nga kjo pandemi”, ka njoftuar AGK-ja.

Sipas njoftimit të AGK-së, duke filluar nga nesër deri të premten, ora 10:00 deri në orën 16:00, gazetarët, kameramanët dhe fotoreporterët, mund të marrin pakon e tyre në zyrat e AGK-së.

“Të njëjtit, mund të tërheqin pakon edhe për kolegët e tyre nga po i njëjti medium, mirëpo me vete duhet ta kenë ID-në e punës (në formë të printuar ,fotografuar, skenuar..), ku specifikohet emri/mbiemri dhe pozita që kanë në medium.  AGK-ja do të vazhdojë angazhimin drejtë sigurimit të donacioneve tjera, në mënyrë që të ndihmohet komuniteti që përfaqësojmë dhe kolegëve tanë t’iu lehtësohet sado pak puna përgjatë kësaj pandemie globale”, ka njoftuar AGK-ja.