Asociacioni i Gazetarëve të Kosovës (AGK) ka kërkuar nga presidentja Vjosa Osmani që të dalë me qëndrim publik në lidhje me Ligjin për Komisionin e Pavarur të Mediave (KPM), pas miratimit në Kuvendin e Kosovës javën e kaluar.

AGK-ja, organizatat e huaja, Zyra e Bashkimit Evropian në Kosovë, Misioni i OSBE-së dhe ambasadat të huaja kanë thënë se ligji nuk është në pajtim me standardet e Këshillit të Evropës.

“AGK-ja, kërkon nga Presidentja e Republikës së Kosovës, zonja Vjosa Osmani – Sadriu, që të formojë qëndrim rreth këtij ligji dhe ta ndajë atë me publikun dhe të mos kufizohet vetëm tek roli i saj formal i dekretimit të ligjeve.  Mediat e lira dhe pluralizmi medial janë gurëthemeli i një shoqërie demokratike dhe kur ky themel fillon të lëkundët seriozisht atëherë Presidentja e shtetit ka për obligim që të deklarohet publikisht”, është thënë në reagimin e AGK-së.

AGK-ja ka thënë se pret që presidentja të ndërveprojë me institucionet tjera në mbrojtje të lirisë së medias dhe shtypit.