Burim Ahmetaj, kryeshef i sekretariatit të KQZ-së ka treguar se 134 mijë email-a që kanë aplikuar për të votuar në zgjedhjet e 14 shkurtit janë ende të pahapura dhe ato do të procedohen gjatë ditëve në vazhdim.

Ahmetaj në mbledhjen e KQZ-së ka thënë se 15 mijë e 672 aplikues, prej tyre 13 mijë e 72 aplikues kanë hapur telefonin dhe KQZ-ja ka pranuar konfirmimin e tyre.

“14 aplikues kanë deklaruar se nuk janë personat që i kemi të dhënat që kanë aplikuar 2460 aplikues nuk janë realizuar thirrjet telefonike, pra këtij procesi do t’i kthehemi sërish për t’i thirrur. Do t’i kthehemi përsëri procesit për t’i telefonuar të cilët nuk kemi mundur të kemi kontakt. Ndërsa 134 mijë email-a janë ende të pahapura”, ka thënë Ahmetaj.

Komisioni Qendror i Zgjedhjeve (KQZ), ditë më parë ka bërë të ditur se 47 kandidatë për deputetë janë identifikuar se janë shpallur fajtorë për vepër penale me një vendim përfundimtar të gjykatës në tri vitet e fundit.