Kryetari i komunës së Prishtinës, Shpend Ahmeti, ka thënë se kjo është koha më e keqe për LV-në për ta marrë qeverisjen.

Ai përmes një postimi në llogarinë e vet në “Facebook”, ka shkruar se pritjet janë joreale në kohën kur financat e shtetit dhe ekonomia janë buzë greminës.

Ahmeti ka theksuar se kriza potenciale e zgjedhjes së presidentit duhet të menjanohet shumë shpejtë.

Postimi i plotë i tij:

Vendimi i Gjykatës Kushtetuese dhe zgjedhjet në fakt ishin shpëtim për Avdullah Hotin dhe për LDK-në. E larguan nga qeverisja në momentin më të vështirë ekonomik e financiar të Kosovës pas luftes. E poashtu edhe inicuan ndryshimet në LDK që nuk do të fillonin pa këtë debakël.

Në anën tjetër, pa marr parasysh rezultatin kjo është koha më e keqe për LVV për ta marr qeverisjen. Pritjet janë joreale në kohën kur financat e shtetit dhe ekonomia janë buzë greminës.

Kriza potenciale e zgjedhjes së presidentit duhet të menjanohet shumë shpejtë.  Dialogu në asnjë mënyrë nuk mund të jetë prioritet. Të vetmet tri prioritete duhet të jenë ekonomia, ekonomia dhe ekonomia.