Kryetari i Prishtinës, Shpend Ahmeti ka komentuar edhe njëherë përplasjen që ka pasur me asamblistin e VV-së, Egzon Azemi në Kuvendin Komunal të kryeqytetit.

Me anë të një postimi në ‘Facebook”, Ahmeti ka folur për vendimet e marra në atë mbledhje dhe ndarjet buxhetore që janë bërë.

Ai po ashtu, ka folur edhe për incidentin me asamblistin e VV-së, Egzon Azemin.

Ai ka thënë se aty nuk ka pasur gjasë për përleshje fizike pasi që deri në atë pikë nuk ka arritur ndonjëherë.

Madje ka akuzuar Azemin, se në të shkuarën VV ia caktonte detyrën që të provokonte të tjerët.

Postimi i plotë pa ndërhyrje:

U komentua shumë nje përplasje dje në Kuvendin Komunal. Nga natyra jam njeri emocional dhe më pengojnë tepër shumë padrejtësitë. Kur dikush pretendon se është parimor por i shkelë prej pradites 100 parime nuk ka çka më flet. Megjithatë, për mua rruga prej emocionit deri te përleshja fizike është shumë e gjatë dhe nuk e kam arritur ndonjëherë. Më kujtohet në VV kur asambleistit në fjalë i jepnin detyra për të provokuar të tjerët, në mënyrë që ta sulmojnë dhe pastaj të ketë viktimizim. Do të ju tregoj edhe rastet konkrete. Por te ne kjo nuk funksionon.