Në qytetin e Gjakovës ditë më parë u mbajt akademi mirënjohjeje për prof.dr. Shyqri Nimanin, organizuar në 80-vjetorin e tij të lindjes dhe 60-vjetorin e opusit multidisiplinar, nga Shoqata “Gjakova Basel” dhe Shoqata e Intelektualëve “Jakova”.

Nga Krenare RIZVANOLLI

Nga referuesit kryesorë dhe të tjerë, që morën  fjalën, u çmua lart kontributi i tij në fusha të ndryshme të arteve figurative, të historisë dhe kulturës shqiptare. Kështu kryetari i Shoqatës së intelektualëve “JAKOVA”, Rushdi Sefa, që mbajti fjalën hapëse dhe përshëndetëse, vuri në dukje vlerat dhe ndihmesën e prof. Shyqri Nimanit për zhvillimin bashkëkohor të arteve figurative në Kosovë, Shqipëri dhe në shumë vende të botës.

Historiani dhe shkrimtari i mirënjohur, Jusuf Buxhovi, tha se prof. Nimani  me emrin dhe veprat e tij, ka zënë me meritë të plotë e të padiskutueshme një vend nderi në listën e gjatë të krijuesve dhe studiuesve të brezit të tij.

Në këtë akademi mirënjohjeje ishin të pranishëm edhe Ministrja e Arsimit, Arberie Nagavci, e cila mbajti një fjalë të shkurtër përshëndetëse, si dhe ministri i Kulturës, Hajrulla Çeku.

Morën pjesë edhe familjarë dhe miq të prof. Nimanit nga Kosova, Shqipëria, dhe vendet tjera.

Vet prof. Nimani, në fjalën e tij, përmes emocioneve të pafshehura, falënderoi shoqatat organizatore të kësaj akademie si dhe pjesëmarrësit.

Më pas ai vuri në dukje se Gjakova është një nga djepat më të shquar në nivel kombëtar për kulturën dhe artin. Si e tillë, me dashamirësinë e saj të njohur, ajo e ndihmoi atë të ecte përpara e të afirmohej në vend e në botë. Prandaj, ai ndjehej përjetësisht borxhli ndaj Gjakovës.

Nder te tjera prof. Shyqri Nimani njihet për karrierën e bujshme që ka lënë gjurmë artistike në vendin tonë, duke filluar me krijimin e logos së Grand Hotel, Kosova Film, simbolin e Universitetit të Prishtinës, deri tek kaligrafimi me dorë në pergamenë e Deklaratës së Shpalljes së Pavarësisë së Kosovës.

Në emër të Shoqatave “Gjakova Basel” dhe “ABSM”, me qendër në Bazel të Zvicrës, kryetari i bordit, Skender Nikoliqi nderoi prof. Shyqri Nimanin me mirënjohje duke vlerësuar lartë kontributin e tij multidisiplinar.

“Për opusin sinjifikant krijues multidisiplinar 60-vjeçar, për kontributin konsistent për njohjen dhe afirmimin në botë të Kosovës e të kombit shqiptar, për veprimtarinë e spikatur në fushën e artit pamor e të studimeve për artin, kulturën, shkencën dhe historinë e Kosovës e të kombit shqiptar, si dhe për veprimtarinë shumëvjeçare në edukimin universitar të gjeneratave të reja”, tha Nikoliqi.

Profesorin e nderuan me mirënjohje edhe shoqata e intelektualëve “Jakova”.

Akademia u përmbyll me një koktej te shoqëruar nën tingujt e bendit “Asgje Sikur Dielli” me solist Alban Nimanin.