Agjencia Kundër Korrupsionit (AKK) do të fillojë verifikimin e pasurisë së ambasadorit të Kosovës në Kroaci, Martin Berishaj.

Lajmin e ka bërë me dije drejtori i AKK-së, Ylli Buleshkaj. “Po, gjatë ditës së sotme kemi filluar inicimin e procedurave fillestare të pasurisë së ambasadorit të Kosovës në Kroaci, Martin Berishaj”, është shprehur shkurt Buleshkaj për “Klan Kosova”.

Ndryshe, mediumi slloven “Planet TV”, ka raportuar se Berisha dyshohet që i ka transferuar rreth 600 mijë euro kesh nga xhirollogaria e tij bankare në Mal të Zi për te politikani slloven, Robert Golob.

“TV Planet” ka publikuar dokumente që pretendonin se është bërë një bartje e parave nga filiali i kompanisë energjetike GEN-i në Beograd në kompaninë “MB Consulting” që është në pronësi të ambasadorit të Kosovës, Martin Berishaj, të cilat më pas ky i fundit i ka tërhequr dhe ia ka dërguar politikanit opozitar slloven, Robert Golob.

Këto akuza janë mohuar ambasadori Berishaj.

Presidentja e Kosovës, Vjosa Osmani, ka kërkuar nga Ministria e Jashtme që ambasadorit Martin Berishaj t’i kërkohet raport me shkrim lidhur me artikullin në një medie në Slloveni.

Kujtojmë, Berishaj është emëruar ambasador në Kroaci në vitin 2021.