Kanali televiziv “Al Jazeera”, i ka kushtuar një artikull Vasfije Krasniqi-Goodman, e cila ishte abuzuar nga policët serbë si adoleshente gjatë luftës në Kosovë dhe tani është duke kërkuar drejtësi si deputete në Kuvendin e Kosovës.

Artikulli  vënë në pah se në vitin 2017, Krasniqi-Goodman ua kishte shkruar një letër të hapur përdhunuesve që e kanë sulmuar atë seksualisht, duke e publikuar këtë letër në llogarinë e vet në “Facebook”.

“Dhunuesit e saj, dy policë serbë, e rrëmbyen dhe e dhunuan kur ishte 16 vjeçe gjatë luftës së Kosovës. Ndaj tyre u ngrit aktakuzë, por më pas u liruan prej akuzës nga Gjykata Supreme e Kosovës në vitin 2014”.

“Al Jazeera” ka treguar se ajo kishte jetuar në Teksas të Shteteve të Bashkuara që nga përfundimi i luftës në Kosovë, por në vitin 2015 ishte kthyer në Kosovë si e mbijetuara e parë e dhunës seksuale gjatë luftës, e cila ka ndarë rrëfimin e saj publikisht, në televizion kombëtar, pa e fshehur identitetin e vet.

“Që atëherë ajo është në një mision, duke ofruar mbrojtje për të mbijetuarit e dhunës në Kosovë dhe përreth botës, duke kërkuar drejtësi për krimet e kryera gjatë luftës në vendin e saj”.

Ky medium ka theksuar se deri më sot asnjë autor i krimeve në Serbi ose Kosovë nuk është dërguar në burg për dhunim seksual.

Këtë vit Krasniqi-Goodman ka vendosur të garojë për një ulëse në Kuvendin e Kosovës në zgjedhjet e 14 shkurtit.

“Kurrë nuk e kam parë veten si dikush që do të garojë për zyrë. Isha e lumtur që isha aktiviste. Isha e lumtur që e tregova rrëfimin tim, duke e përhapur fjalën e asaj që ndodhi në Kosovë gjatë luftës”, ka thënë Krasniqi-Goodman.

Ajo dhe partia që iu bashkua, Lëvizja Vetëvendosje e krahut të majtë, kanë fituar bindshëm me mbi 50 për qind të votave.

Krasniqi ishte në mesin e 10 deputetëve me më së shumti përkrahje, duke marrë 61 mijë e 885 vota.

Gjatë luftës së Kosovës më 1998 dhe 1999, burime të ndryshme vlerësojnë se 20 mijë  gra e burra janë dhunuar seksualisht dhe janë torturuar nga policia serbe e ushtria jugosllave.

Turpi dhe stigmatizimi që e rrethojnë temën e dhunimit seksual gjatë luftës i parandalojnë të mbijetuarit që të flasin publikisht për atë që u ka ndodhur para 22 vjetëve.