Kanë mbetur më pak se katër ditë afat që bizneset me më pak se 50 punëtorë dhe 10 milionë euro qarkullim vjetor të dëshmojnë këtë në KESCO, si kusht për ta vazhduar furnizimin me çmime të rregulluara. Në të kundërtën rrezikojnë që, bashkë me bizneset tjera me më shumë se 50 punëtorë ose 10 milionë euro qarkullim vjetor, të dalin në tregun e hapur nga 1 Qershori

“Rruga drejt tregut të lirë… me semafor të kuq!”, kështu e ka filluar reagimin e tij, njëri ndër drejtuesit e kompanisë “ABI”, nga Prizreni, Alajdin Fusha.

Fusha ka bërë të ditur se ka dërguar kërkesë te të gjithë operatorët e licencuar për të na dërguar ofertat dhe kushtet për furnizim me energji elektrike, por që ka pranuar vetëm një përgjigje ne KEK Energy. “KEK Energy na njofton se nuk kanë kapacitet të lirë prodhimi dhe për shkak të kufizimeve nga marrëveshjet ekzistuese, nuk mund të na ofrojnë kontratë.”, ka shkruar Fusha në llogrinë e vet bë facebook.

Njoftimi i plotë i tij:

Shoqata jonë, me qëllim që të përgatitemi për ndryshimet që hyjnë në fuqi më 1 qershor 2025, ka dërguar kërkesë te të gjithë operatorët e licencuar për të na dërguar ofertat dhe kushtet për furnizim me energji elektrike.

Kujtojmë që nga kjo datë, të gjitha kompanitë që në cilindo muaj të vitit 2024 kanë pasur mbi 50 punëtorë ose mbi 10 milionë euro qarkullim vjetor, kalojnë automatikisht në tregun e lirë (ose të “paregullt”) të energjisë elektrike.

Ja edhe një nga përgjigjet që kemi pranuar — me shumë mirësjellje, por pak energji. KEK Energy na njofton se nuk kanë kapacitet të lirë prodhimi dhe për shkak të kufizimeve nga marrëveshjet ekzistuese, nuk mund të na ofrojnë kontratë.

Ne do të vazhdojmë të publikojmë përgjigjet e operatorëve për transparencë, dhe për t’ju ndihmuar të kuptoni më mirë se çka na pret pas 1 qershorit.

Tregu i lirë, por me oferta të mbyllura!

Nga 19 kompani të licensuara vetëm KEK’u na kthej përgjegje.