Një valë e dytë koronavirusi ka goditur disa shtete të SHBA-ve disa javë pas heqjes së karantinës. Numri i të infektuarve është rritur në Florida, Teksas dhe Arizona, sipas një raporti të publikuar të mërkurën.

“Kemi një valë të re që po vjen në disa pjesë të vendit” u shpreh Eric Toner nga Universiteti Johns Hopkins.

“Deri më tani është e vogël dhe e largët, por po vjen”, shtoi ai më tej. Florida raportoi 8,553 raste të reja me Covid-19 këtë javë, më shumë se çdo periudhë tjetër shtatë-ditore, pas heqjes së masave të qëndrimit në shtëpi afërsisht një muaj më parë.

Në Teksas, numri i pacientëve të shtruar në spital është rritur me 6.3 për qind, rritja më e madhe ditore që nga nisja e pandemisë. Dhe në Arizona, numri i rasteve të reja u rrit me 1,187 më 2 qershor.

Rritja e shifrave ka bërë që ekspertët të alarmohen edhe pse në përgjithësi, niveli i përgjithshëm i infektimit duket se po bie.