Pas letrës së sotme që lideri i opozitës, Memli Krasniqi, i ka dërguar kryeministrit Albin Kurti për zhvillimet në pjesën veriore të Kosovës, kryeministri Albin Kurti sonte u ka bërë ftesë krerëve të tri partive opozitare parlamentare, PDK, LDK, AAK për takim nesër paradite.

Burime nga Zyra e Kryeministrit bëjnë të ditur se Albin Kurti u ka dërguar ftesë liderit të PDK-së Memli Krasniqi, atij të LDK-së, Lumir Abdixhiku dhe të AAK-së Ramush Haradinaj për takim të martën.

Burimet brenda PDK-së kanë konfirmuar se kreu i PDK-së, Memli Krasniqi ka konfirmuar takimin me kryeministrin Kurti. Edhe kreu i AAK-së, Ramush Haradinaj e ka konfirmuar takimin me Kurtin.

Mësohet se takimi do të mbahet në ora 8 të mëngjesit në kryeministri dhe të tre liderët opozitarë do ta takojnë së bashku Kurtin.