Një tjetër lajm i mirë vjen nga skitari Albin Tahiri, i cili po e përfaqëson Kosovën në garat ndërkombëtare të Federatës Ndërkombëtare të Skitarisë (FIS).

Skitari Tahiri sot plotësoi kriteret e nevojshme për normën olimpike “Pekini 2022”, edhe në disiplinën e lëshimit. Ai çoi në katër numrin e kritereve të nevojshme për katër disiplinat e skijimit alpin si: lëshim, kombinim alpin, sllallom të madh dhe sllallom. I ka mbetur vetëm edhe super sllallomi i madh.

“Po, sot plotësova kriteret edhe në lëshim. Më duhet vetëm edhe një rezultat për super sllallomin e madh për të siguruar kriteret në të gjitha disiplinat. Këtë do ta lë për sezonin e ardhshëm”, ka thënë Tahiri për Komitetin Olimpik të Kosovës.

Paraqitja e sotme në garën e Tarvisios së Italisë, ishte ndër më të mirat në karrierën e tij.

Ai sot pati dy gara në lëshim. Në të parën doli i 16-ti nga 72 garues, ndërsa në të dytën i 11-ti. Madje, në garën e dytë kishte vetëm 1.9 sekonda më shumë se sa vendi i parë, që sipas tij është rezultati më i mirë ndonjëherë për të.

Komiteti Olimpik i Kosovës me presidentin Ismet Krasniqi uron suksesin e radhës të Albin Tahirit dhe sportistëve tjerë, të cilët janë në rrugë të mbarë për të siguruar sa më shumë norma olimpike për Lojërat Olimpike Dimërore “Pekini 2022”.