Kryetari i Bashkimit Demokratik për Integrim, Ali Ahmeti ka përkujtuar dëshmorin e kombit Luan Haradinajn i cili 24 vjet më parë ra heroikisht në njërën prej betejave të para të UÇK-së kundër forcave pushtuese serbe, më 6 maj të vitit 1997, në kufirin shqiptaro-shqiptar.

Ahmeti përmes një postimi në faqen e tij zyrtare në facebook përkujton 24 vjetorin nga rënia e dëshmorit Luan Haradinaj i cili u bë pjesë e përjetësisë dhe e frymëzimit të gjeneratave të tëra atdhedashëse.

“Pavarësia e Kosovës është meritë edhe e Luanit, kurse e sotmja pa dyshim që është edhe gjurmë e pashlyeshme e tij.

Ne që ishim pranë teje, ne që të njohëm nga afër, këto përvjetorë i kujtojmë me shumë mall e dhimbje.

Luan, sa shumë që na mungon të gjithë neve, sa shumë që i mungon Kosovës dhe gjithë shqiptarëve.

Do të mbaj në kujtimet e mia përgjithmonë. Në zyrën time, në krah të shumë luftëtarëve tjerë të kombit, me shumë mall e kujdes vazhdoj të ruaj dhe portretin tënd Luan, ai qëndron meritor dhe çmallues.

LAVDI përjetësisht Luan Haradinajt dhe gjithë dëshmorëve të kombit”, ka shkruar Ahmeti.