Ai lëvizte ngadalë, në secilën nga duart e tij të ngrira mbante një shkop, ndërsa rreth këmbëve ishte mbështjellur me një trastë gjumi.

Të mërkurën e 27 nëntorit, dy punëtorë të një platforme nafte hasën në një burrë që po ecte i shkujdesur përgjatë një shtegu.

Sam Benastick, 20 vjeç, sapo kishte kaluar 50 ditë në pyll në provincën e Kolumbias Britanike, një rajon i largët në veriperëndim të Kanadasë, raportoi “The Guardian” të enjten e 28 nëntorit.

Punonjësit e shpëtimit e kërkonin prej disa javësh.

Ky alpinist kanadez u nis më 7 tetor për një udhëtim dhjetë-ditor, në veri të Maleve Shkëmbore, në Parkun Redfern-Keily.

Një mjedis që mund të jetë “i pamëshirshëm”, sipas faqes së internetit të parkut.

Gjatë qëndrimit të tij, i cili u kthye në një makth, veçanërisht për shkak të klimës së ngrirë me temperatura deri në -20°C, i riu sajoi një strehë pranë një përroi në shpatin e malit.

Ai kishte ndërtuar një kamp në shtratin e këtij përroi të tharë.

Nga fundi i tetorit, kur ai nuk ishte kthyer, familja e tij kishte nisur kërkimet duke njoftuar autoritetet.

Helikopterët, qentë e malit dhe më shumë se pesëdhjetë njerëz u angazhuan për javë të tëra, por më kot.

Kur punëtorët e gjetën aventurierin, ai nuk mund të qëndronte më në këmbë.

Këtë të mërkurë, Policia Mbretërore Kanadeze konfirmoi se ai ishte shtruar në spital në provincën e Kolumbias Britanike.

Ai vuan nga morthi dhe ishte pjesërisht i intoksikuar nga tymi i zjarrit në strehën e tij të improvizuar.

Qendra e Kërkimit dhe Shpëtimit në Okanagan e quajti zbulimin një “mrekulli të pabesueshme”.

Gjyshja e tij ndau me CBC Radio lehtësimin e saj të jashtëzakonshëm pasi gjeti Sam-in: “Nuk mund të ndalem së buzëqeshuri. Jam shumë krenare për të, sepse ia doli të qëndronte gjallë”.