Mbrojtësi Dani Alves ka thënë se Real Madridi është me fat që Barcelona e gjeti formën e saj shumë vonë, duke pretenduar se blaugranët janë mjaft të talentuar për të sfiduar titullin e La Ligës.

Barcelona mposhti Real Sociedadin 1-0 të enjten mbrëma, por mbetet 15 pikë prapa Real Madridit në fazën e fundit të sezonit.

“[Real Madridi] është me fat që u zgjuam aq vonë sa nuk mundëm të luftonim për titullin. Tani duhet të mendojmë për një objektiv tjetër”, ka thënë Alves për Barca TV.

Për fitoren ndaj Sociedadit, e cila i dha fund një serie humbjesh prej dy ndeshjesh, Alves ka deklaruar: “Në pjesën e parë ne kishim kontrollin, bëmë presion, por më pas ulëm intensitetin dhe ata filluan të na shtypnin. Duhet të dish të vuash. Në futboll është e vështirë të fitosh, por ne fituam”.