Ambasada e Shteteve të Bashkuara të Amerikës (ShBA) në Prishtinë ka thënë se në takimin e nivelit të lartë të sundimit të rendit dhe ligjit, të drejtuar nga kryeministri i Kosovës, Ramush Haradinaj, zyrtarë të kësaj ambasade kanë marrë garanci se Kosova ka ligjet dhe burimet që i duhen për të luftuar korrupsionin dhe zbatimin e drejtësisë në mënyrë të barabartë për të gjithë qytetarët, pa trajtim apo lidhje të veçantë për dikë.

“Problemi nuk ka të bëjë me ligjin, problem është politika. Amerikanët flasin për shkak të përkushtimit tonë për të ardhmen e Kosovës”, ka theksuar kjo ambasadë në një postim në faqen zyrtare në “Facebook”.

Në të njëjtin postim, kjo ambasadë ka publikuar edhe disa fotografi në të cilat shihen zyrtarë dhe udhëheqës të Kosovës.

“Kush po mungon në këto fotografi?”, ka pyetur ambasada, duke shtuar se “Kosova ka sukses kur gratë udhëheqin”.

Ndërkohë, në një komunikatë të Qeverisë së Kosovës është thënë se në këtë takim, është kërkuar përkushtim më i madh nga bartësit e institucioneve të drejtësisë dhe një dinamikë e shtuar, në mënyrë që të shënohen rezultate pozitive në zgjidhjen e lëndëve të grumbulluara dhe të shënjestruara, si dhe në forcimin e sundimit të rendit dhe të ligjit.

/Epoka e re/