Ambasadori i ShBA-së në Beograd, Christopher Hill, ka thënë se pavarësisht krizës së ditëve të fundit, nuk do të thotë që formimi i Asociacionit të komunave me shumicë serbe duhet të injorohet.

Hilli ka thënë se Asociacioni duhet të bëhet që të arrihet një zgjidhje politike.

“Mendoj se janë pikërisht ata elementë në tavolinë që i përkasin atje dhe e di që është e vështirë të përqendrohesh në to, veçanërisht kur e kemi parë krizën në ditët e fundit, por kriza nuk do të thotë që mund të injorosh atë që ke, duhet të bëjmë, që është të arrihet një zgjidhje politike”, ka thënë Hill.

Më tutje, ai ka theksuar se është në interesin e ShBA-së që të vazhdojë gjetja e një zgjidhjeje politike “të bazuar në elemente të qarta që janë pjesë e marrëveshjes së arritur 5-6 muaj më parë”.

“Duam të shohim formimin e Asociacionit të Komunave me shumicë serbe. Është e drejtë të thuhet se Kurti nuk është entuziast për këtë, por mendoj se ai e kupton që është një nga elementët kyçe në tavolinë, ashtu siç duhet të vazhdojmë me ndërkombëtarizimin, që nënkupton mundësinë e anëtarësimit të Kosovës në organizata të ndryshme ndërkombëtare. Këto nuk janë hapa të lehtë për palën serbe, por janë pjesë e marrëveshjes së përgjithshme”, ka thënë Hilli.

Ai ka thënë se të gjithëve u duhet qetësimi i tensioneve dhe mirëkuptimi se së shpejti serbët dhe shqiptarët në Kosovë do të duhet të gjejnë një mënyrë për të jetuar si fqinj.

“Këto lloj krizash duhet të zëvendësohen nga një proces politik që i bën të gjithë të ndihen rehat, në mënyrë që kur të zgjohen në mëngjes të mos shqetësohen për problemet e sigurisë. Ne synojmë ta bëjmë këtë”, ka thënë Hilli.

I pyetur për të ardhmen e dialogut ndërmjet Beogradit dhe Prishtinës dhe marrëveshjes nga Brukseli dhe Ohri, ambasadori amerikan ka theksuar se “sado i vështirë të jetë dialogu për pjesëmarrësit, ne duhet të vazhdojmë”.

“Sa i përket rolit të ShBA-së, ne jemi shumë të përkushtuar për dialog, jemi në kontakt të përditshëm me të gjitha palët, por veçanërisht me partnerët tanë nga Bashkimi Evropian. Mendoj se të gjithë në Ballkan duhet të kuptojnë se Amerika dhe Bashkimi Evropian kanë shumë gjëra që duhet të bëjnë së bashku dhe ne do t’i bëjmë së bashku. Pra, nuk do të ndahemi për gjëra si Kosova, do të jemi të bashkuar. Unë mendoj se ne do t’i kthehemi procesit të dialogut dhe zotit Lajçak, i cili ka mbajtur një barrë të rëndë për ta bërë këtë, padyshim që do të duhet të vazhdojë ta bëjë këtë për ca kohë”, ka thënë Hilli, duke shtuar se ShBA-ja është e përkushtuar për suksesin e procesit të dialogut “sepse besojnë se kjo është mënyra e vetme për të ecur përpara”.