Ambasadori britanik në Kosovë, Jonathan Hargreaves, 25-vjetorin e çlirimit të Kosovës, e ka nisur me përkujtimin e 14 pjesëtarëve të Forcave të Armatosura të Britanisë së Madhe që kanë humbur jetën gjatë shërbimit në KFOR.

Hargreaves, mes tjerash ka thënë se i kujtojnë dhe vajtojnë të gjitha vuajtjet njerëzore që ndodhën në Kosovë dhe ata të cilët vazhdojnë të durojnë pasojat e konflikteve.

“Filluam sot në Memorialin e Mbretërisë së Bashkuar në Prishtinë ku përkujtuam 14 pjesëtarët e Forcave të Armatosura Britanike që kanë humbur jetën gjatë shërbimit në KFOR. Kujtuam dhe reflektuam për ata që bënë sakrificën përfundimtare për ruajtjen e paqes në Kosovë dhe rajon. Ne kujtojmë dhe vajtojmë të gjitha vuajtjet njerëzore që ndodhën në Kosovë dhe në mbarë rajonin, dhe të gjithë ata që vazhdojnë të durojnë pasojat e këtij dhe konflikteve të tjera”, ka thënë Hargreaves.