Ka përfunduar takimi i Komisionit për Punë të Jashtme dhe Diasporë me ambasadorin e Gjermanisë, Jorn Rohde, ku është diskutuar për liberalizimin e vizave dhe dialogun me Serbinë.

Kryetari i komisionit, Haki Abazi, ka deklaruar se ambasadori gjerman ka kërkuar që dialogu me Serbinë të jetë sa më konstruktiv që është e mundur.

Në një konferencë për media, ai ka deklaruar se Gjermania është e interesuar që çështja e liberalizimit të vizave të përfundojë sa më shpejtë që është e mundur.

“Liberalizimi i vizave është një ndër temat për të cilat diskutuam bashkë. Interesimi i Gjermanisë është që kjo të përfundojë sa më shpejt që është e mundur, shumica e vendeve janë pro. Mirëpo ishte edhe rekomandimi i ambasadorit që të angazhohemi më shumë te vendet që janë skeptike. Temë tjetër të cilën e mbuluam së bashku janë investimet tjera nga kompanitë gjermane. Mjedisi investiv duhet të vazhdojë të përmirësohet, sidomos në luftën kundër korrupsionit. U veçua në mënyrë eksplicite numri i lartë i gjermanfolësve”, ka deklaruar Abazi.

Ai ka thënë se dialogu duhet të kthehet në çështje të ndërsjella mes Kosovës dhe Serbisë, e jo për çështje të brendshme të Kosovës, siç e ka keqpërdorur Serbia.

“Çështja e dialogut me Serbinë ishte temë e diskutimit. Ambasadori kërkoi që ky dialog të bëhet në mënyrën më konstruktive të mundshme. Insistimi jonë ishte që ky dialog të mos përdoret për ta mbajtur peng integrimin e Kosovës, siç e ka mbajtur në të kaluarën. Interesimi jonë është që dialogu të mos ndikojë në aspektet tjera, pasi që Serbia e ka përdorur dialogun për ta prolonguar procesin e integrimit të Kosovës”, është shprehur Abazi./KP/