Ambasadori i Shteteve të Bashkuara në Kosovë (ShBA), Philip Kosnett, ka thënë se emërimi i Richard Grenell, si i dërguar i presidentit amerikan, Donald Trump për dialogun Kosovë-Serbi, tregon përkushtimin e qeverisë amerikane për një përparim të shpejt drejt një të ardhme paqësore për rajonin.

“Mezi pres të punojmë me ambasadorin Ric Grenell si të dërguarin e posaçëm të presidentit për negociatat e paqes mes Serbisë dhe Kosovës. Emërimi i tij, krahas Matt Palmer (i dërguar i Departamentit të Shtetit për Ballkanin Perëndimor), tregon përkushtimin e qeverisë amerikane për përparim të shpejtë drejt një të ardhme paqësore për rajonin”, ka shkruar Kosnett në llogarinë e vet në “Twitter”.

Emërimin e diplomatit Grenell e ka mirëpritur edhe Bashkimi Evropian, duke ritheksuar gatishmërinë për të vazhduar bashkëpunimin me ShBA-në në Ballkanin Perëndimor.

Ndërsa presidenti i Kosovës, Hashim Thaçi dhe kryeministri në detyrë, Ramush Haradinaj, kanë thënë se do të punojnë ngushtë me Grenell për të siguruar paqen përfundimtare në Ballkan.