Ka nisur në Portin e Durrësit stërvitja e madhe ushtarake me dislokimin që ndodh për herë të parë që prej Luftës së Dytë Botërore në Evropë.

Ambasadorja amerikane në Tiranë, Yuri Kim, ka përgëzuar Forcat e Armatosura Shqiptare dhe Ministrinë e Mbrojtjes për organizimin e ceremonisë që është zhvilluar të martën.

Ajo ka thënë se roli i Shqipërisë në stërvitjen “Defender 21” është domethënës dhe roli i Shqipërisë në NATO vetëm po njeh rritje.

“Roli drejtues Shqipërisë në këtë stërvitje është domethënës dhe roli i Shqipërisë në Aleancë vetëm rritet. Po të shohësh në rajon vihet re që Shqipëria është pritëse e shumë aktiviteteve në rajon. Roli i Shqipërisë në Aleancë është më i rëndësishëm se kurrë. Shqiptarët kanë luftuar me ne krah për krah në konflikte të ndryshme. Nuk i harrojmë sakrificat dhe do të jemi kur Shqipëria të ketë nevojë. E njohim trimërinë tuaj dhe jemi të nderuar t’ju quajmë aleatët tanë”,  ka thënë Kimi.

Ambasadorja Kim ka theksuar se se Shqipëria ofron një bazë të rëndësishme që i jep NATO-s mundësinë që të përgjigjet shpejt dhe me efektivitet.

“Nuk keni hezituar kurrë të ofroni trupat tuaja, apo të prisni aleatët në vendin tuaj. Na keni përsëritur gjithmonë dhe na keni treguar potencialin teknik të Shqipërisë. Jemi mirënjohës për mirëpritjen. Kjo stërvitje është historike në Shqipëri, por vlen edhe të përmendet se disa prej stërvitjeve do të ndodhin këtu, në portin e Durrësit. Kjo stërvitje është fillimi i gjërave më të mëdha që do të vijnë. Do të stërvitemi më shpesh, mbetemi me ju”, ka thënë ambasadorja Kim./tvklan/