Një anije e dytë me drithëra është nisur nga porti ukrainas i Detit të Zi të Chornomorsk, pranë qytetit të Odesa, sipas njoftimit të zyrtarëve.

Anija, e quajtur Aroyat, u largua nga porti pasi ngarkoi 17,600 ton grurë ukrainas për në Egjipt, sipas ministrit të Infrastrukturës së Ukrainës, Oleksandr Kubrakov.

Është anija e dytë që transporton grurë që largohet nga porti këtë javë pasi një anije më e vogël u largua nga Chornomorsk nën korridorin e përkohshëm humanitar të Ukrainës, tha Kubrakov.

Ukraina krijoi korridorin e përkohshëm muajin e kaluar pasi Rusia u tërhoq nga një marrëveshje e ndërmjetësuar nga OKB që garantonte kalimin e sigurt për anijet me drithëra në Detin e Zi.

Të paktën shtatë anije janë nisur deri më tani, duke lundruar në jug nga portet kryesore të Ukrainës rreth Odesës, që nga hapja e korridorit.