Kandidatja demokrate për presidente të Shteteve të Bashkuara, Kamala Harris, ka tre për qind epërsi ndaj rivalit të saj republikan, Donald Trump, në garën e tyre të ngushtë para zgjedhjeve të 5 nëntorit, sipas anketës më te re të agjencisë “Reuters” dhe “Ipsos”-it.

Anketa katërditore, e mbyllur të hënën, tregoi se Trumpi, që qëndronte për 6 për qind prapa Harrisit në një anketë të periudhës nga 20 deri më 23 shtator, ishte kandidati i parapëlqyer për një varg çështjesh ekonomike dhe disa votues mund të binden nga pretendimet e tij se imigrantët që ndodhen ilegalisht në vend janë të prirë për krim, pohime që janë kundërshtuar me të madhe nga akademikë e organizata, raporton agjencia “Reuters”.

Margjina e gabimit në rezultatet e anketës ishte 3 për qind, aq sa epërsia e zonjës Harris ndaj miliarderit Trump.

Pjesëmarrësit në anketë e cilësuan ekonominë se çështjen kryesore me të cilën ballafaqohet vendi. Rreth 44 për qind e tyre thanë se Trumpi ka qasje më të mirë për adresimin e “kostos së jetesës”, në krahasim me 38 për qind që menduan kështu për Harrisin.

Në mesin e një vargu të problemeve ekonomike që presidenti duhet t’i adresojë, rreth 70 për qind e pjesëmarrësve thanë se kostoja e jetesës duhet të jetë më e rëndësishmja, ndërsa një pjesë e vogël e i përmendi tregun e punës, taksat ose “të më lënë mua më mirë financiarisht”.

Duket se Trumpi po përfiton nga shqetësimi i gjerë për imigrantët, që tani për tani janë në nivelin më të lartë në Amerikë për më shumë se një shekull. Rreth 53 për qind e votuesve në anketë thanë se ata pajtoheshin me një deklaratë që “imigrantët që ndodhen ilegalisht në vend janë rrezik për sigurinë publike”, në krahasim me 41 për qind që nuk u pajtuan./Nacionale