Në Dhomat e Specializuara të Kosovës në Hagë është marrë vendim nga kryetari i trupit gjykues Charles Smith III se në çështjen gjyqësore ndaj ish-krerëve të UÇK-së, Hashim Thaçit, Kadri Veselit, Rexhep Selimit dhe Jakup Krasniqit të anulohen seancat e datës 21 mars dhe 22 gusht 2024. Sipas trupit gjykues, ky vendim është marrë për shkak se ka kontradikta në mes datave.

Në fillim të seancës gjyqësore, Smith III ka theksuar se do të fillojë dëshminë dëshmitari i 49-të i Zyrës së Prokurorit të Specializuar me kodin W04811.

Sot e pranishme në seancën e gjyqit ishte edhe bashkë-mbrojtësja e re e ekipit të Thaçit, Nina Tavakoli për të cilën është thënë se do të parashtrojë pyetje për dëshmitarin. Po ashtu, ajo pati një çështje për të parashtruar mirëpo për këtë gjë kërkoi sesion privat gjë e cila u miratua nga trupi gjykues.

Në fillim të seancës, Smith III ka njoftuar se Thaçi dhe Krasniqi janë të pranishëm në sallë përmes video-lidhjes ndërsa Vesli e Selimi janë fizikisht aty.