Federata e Futbollit të Kosovës (FFK) dhe sponsori i Superligës, “Albi Mall”, vazhdojnë të ndajnë çmimin “Ylli i Javës”. Ky çmim për javën e 15-të në “Albi Mall Superligë” i është ndarë futbollistit të FC Drita, Arb Manaj.

Vlerësimi i më të mirit të javës është bërë nga Komisioni i Veteranëve të Futbollit, në përbërje të Lulzim Berishës, Sunaj Keqit dhe Selajdin Jerliut. Ky komision vendosi që çmimi “Ylli i Javës” për xhiron e pesëmbëdhjetë t’i takojë Arb Manajt, i cili asistoi në golin e dytë dhe shënoi golin e tretë, duke qenë lojtari më i mirë i FC Drita në fitoren e rëndësishme kundër FC Ballkani (2:3) dhe duke i mundësuar ekipit të tij 3 pikë për shkëputje 8 pikëshe në krye të tabelës.

Pasi ka marrë këtë çmim, Manaj është shprehur i lumtur që është vlerësuar si më i miri i javës.

“Ishte një ndeshje derbi dhe shumë e vështirë, pasi udhëtonim te FC Ballkani, i cili për 2 vite e gjysmë nuk ka pësuar në fushën e tij, por ne arritëm ta fitojmë. Kemi katër ndeshje radhazi me fitore dhe shpresoj që t’i fitojmë të gjitha 3 ndeshjet deri në fund të stinorit vjeshtor. Jam i lumtur me performancën time individuale, por më e rëndësishmja është që po arrij ta ndihmoj ekipin. Falënderimi më i madh shkon për bashkëlojtarët e mi”, ka thënë Manaj për faqen zyrtare të FFK-së.