Të enjten ndaj Sllovenisë për Kosovën në ndeshje zyrtare do të debutojë Albana Arifi, që gjatë verës fitoi të drejtën të paraqitet me Përfaqësuesen e Kosovës.

Albana, që ka të kaluar shumë të suksesshme me Suedinë, ka katër ditë që është bashkuar me përfaqësuesen dhe mezi po pret ta luajë ndeshjen e parë zyrtare me Kosovën. Albana pritet të jetë një nga lideret e Kosovës dhe të japë kontribut së bashku me vashat e tjera që të kalojnë në nivel më të lartë. Kosova të enjten luan ndaj Sllovenisë në Maribor, kurse të dielën e presim Gjermaninë në Prishtinë. “Po ndihem shumë mirë. Nuk mund ta përshkruaj me fjalë. Me padurim po e pres ndeshjen e parë kundër Sllovenisë por, mbi të gjitha, jam duke e pritur debutimin kundër Gjermanisë në Pallatin e Rinisë para publikut tonë, me shpresë që salla do të mbushet”, ka thënë Albana Arifi.

Ajo është e kënaqur me ekipin, punën që po e bëjnë vashat dhe selektori Agron Shabani. “Edhe pse ballafaqohemi me dy superfuqi të hendbollit botëror, unë personalisht në secilën ndeshje hyj për fitore dhe luaj 100 % deri në sekondën e fundit për fitore. E respektoj secilin kundërshtar, por nuk i frikësohemi askujt. Do ta japim maksimumin që ta bëjmë secilin kundërshtar të mos ndihet komod kur të ballafaqohet me ne”, ka deklaruar Albana Arifi.