Armenia zyrtarisht ka njohur shtetin palestinez. Kështu ka bërë me dije Ministria e Jashtme e këtij shteti përmes një deklarate për medie më 21 qershor.

Armenia është bërë shteti i fundit që njeh shtetin palestinez, pavarësisht kundërshtimeve nga Izraeli.

Jerevani mbështet rezolutën e Kombeve të Bashkuara për një armëpushim të menjëhershëm në luftën mes Izraelit dhe Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian, në Gazë dhe mbështet zgjidhjen me dy shtete në konfliktin izraelito-palestinez, është thënë në deklaratë.

Armenia ka theksuar se “jemi sinqerisht të interesuar që të vendoset paqja afatgjatë dhe stabiliteti në Lindjen e Mesme”.

Jerevani, që vetë ka qenë i përfshirë në konflikt ne Azerbajxhanin fqinj për dekada të tëra, ka dënuar ofensivën ushtarake të Izraelit në Gazë.

“Armenia shpreh keqardhje për përdorimin e infrastrukturës civile si mburojë gjatë konflikteve të armatosura dhe dhunës karshi popullatës civile”, ka thënë Ministria e Jashtme.

Në deklaratë po ashtu është thënë se Jerevani shpreh keqardhje për marrjen e pengjeve civile nga Hamasi dhe “i bashkohemi kërkesave të komunitetit ndërkombëtar për t’i liruar ata”.

Autoriteti Palestinez, që ushtron vetëqeverisje të kufizuar në Bregun Perëndimor – që gjendet nën pushtimin izraelit, ka mirëpritur vendimin e Armenisë.

“Kjo njohje kontribuon pozitivisht në ruajtjen e zgjidhjes me dy shtete e cila përballet me sfida sistematike, dhe promovon sigurinë, paqen dhe stabilitetin për të gjitha palët e përfshira”, është thënë në deklaratën e presidencës së Autoritetit Palestinez.

Ky vendim i Jerevanit ka nxitur zemërim në Izrael, shtet që ka ftuar në bisedë ambasadorin armen. “Pas njohjes nga Armenia të shtetit palestinez, Ministria e Jashtme ftoi ambasadorin armen në Izrael në takim për qortim të ashpër”, është thënë në një deklaratë për medie.

Spanja, Irlanda dhe Norvegjia janë në mesin e shteteve perëndimore që zyrtarisht e kanë njohur shtetin palestinez muajin e kaluar, duke nxitur Izraelin që të tërheqë ambasadorët e tij nga Madridi, Dublini dhe Oslo.

Njoftimi për njohjen e shtetit palestinez vjen në kohën kur lufta në Gazë po vazhdon. Lufta nisi pasi Hamasi sulmoi jugun e Izraelit më 7 tetor, duke vrarë afër 1 200 persona dhe duke rrëmbyer afër 250 të tjerë.

Si pasojë e ofensivës izraelite, në Gazë janë vrarë më shumë se 37 000 persona dhe pothuajse e gjithë popullsia, prej 2.3 milionë banorësh e kësaj enklave, është zhvendosur.