Presidenti francez Emmanuel Macron është zotuar të “bëjë gjithçka që është e mundur” për të pasur një “armëpushim olimpik” në konfliktet në Gaza dhe Ukrainë gjatë Lojërave të ardhshme verore që do të mbahen në Paris.

Lojërat Olimpike do të zhvillohen nga 26 korriku deri më 11 gusht. Mbi 300,000 njerëz pritet të ndjekin ceremoninë e hapjes në lumin Sena të Parisit.

“Ne duam të punojmë drejt një armëpushimi olimpik dhe mendoj se ky është një rast që unë të angazhohem me shumë partnerë tanë”, tha Macron në një intervistë për BFMTV të hënën.

Udhëheqësi francez tregoi se do të kërkonte ndihmë për organizimin e një armëpushimi nga presidenti kinez Xi Jinping, i cili do të vizitojë Parisin në fillim të majit. Xi kishte “të njëjtën detyrë” në 2022 me rastin e Lojërave Olimpike Dimërore, vuri në dukje Macron

Tradita e një ‘armëpushimi olimpik’ daton në Greqinë e lashtë, kur sundimtarët ndërluftues ranë dakord të vendosnin armët gjatë lojërave, në mënyrë që atletët dhe spektatorët të mund të udhëtonin të sigurt për në dhe nga vendet e ngjarjes.

Zbatimi i një armëpushimi të tillë u prezantua për herë të parë nga Macron në mars, kur ai tha se Rusisë do t’i kërkohet të respektojë një armëpushim në Ukrainë gjatë Olimpiadës së Parisit. “Rusia duhet ta bëjë këtë. Kjo është ajo që ka ndodhur gjithmonë”, tha presidenti francez në atë kohë në një intervistë nga Parisi.